29 May 2017

దేవునిఆత్మ యెహేజ్కేలును తీసుకుపోయి మానవ అస్థిపంజరాలతో నిండి ఉన్న ఒక లోయలో దించాడు. అవి బాగా ఎండిపోయి ఉన్నాయి.

దేవుడు-"నరపుత్రుడా,ఈ ఎముకలు బ్రతకగలవా?"
యెహేజ్కేలు-"యెహోవాప్రభూ! అది నీకే తెలుసు!"

అందుకు ఆయన-"ఆ ఎముకలతో నా తరపున మాట్లాడు. వాటితో ఇలా చెప్పు, ‘ఎండిన ఎముకల్లారా! మీరు బ్రతుకుతారు.నేను మీకు నరాలూ మాంసమూ ఇస్తాను. మీమీద చర్మం కప్పుతాను. మీలో ఊపిరి పోస్తాను'"

ఆవిధంగానే ప్రవక్త పలుకుతూండగానే గడగడ అని శబ్దంతో ఎముకలు ఒకదానితో ఒకటి కలుసుకొన్నాయి. నేను ఇంకా చూస్తూడగానే ఎముకల మీదికి నరాలు, మాంసం వచ్చాయి; వాటిమీద చర్మం కప్పబడింది. అయితే వాటిలో ఊపిరి లేదు.

అప్పుడు ఆయన-"జీవాత్మవచ్చునట్లు దైవావేశంతో చెప్పు!"
ఆవిధంగానే పలుకగా..వెంటనే శవాలలోకి ఊపిరి వచ్చింది. వారు సజీవులై గొప్ప సైన్యంగా నిలబడ్డారు.!

దేవుడు శరీరాన్ని, జీవాత్మని వేరువేరుగా అనుగ్రహించాడు. ఆదిలో ఆదామును పుట్టించినప్పుడు కూడా అలాగే చేశాడు. ఎంతో విలువైన, అత్యంత ఙ్ఞానంతో రూపొందించబడిన ఈ శరీరంలో జీవాత్మలు ఉన్నప్పుడే చక్కగా పనిచేసి, విలువను కలిగివుంటుంది. ఒకవేళ లేకుంటే దాని విలువ శూన్యం(పాతి పెట్టబడుతుంది కదా!). ఈ జీవాత్మ దేవుని(ఆత్మ) మూలంగానే మనకు ఇవ్వబడింది.

ఇది దేన్నీ తెలియజేస్తుందంటే..దేవుని ఆత్మలేని దేవుని వాక్యం జ్ఞానాన్ని సూచిస్తుంది. అది జీవంలేని విలువైన శరీరంతో సమానం. వాక్య జ్ఞానము మాత్రమే కలిగి జీవంలేకుండా ఉన్న(శాస్త్రులు పరిసయ్యుల భక్తివలె) ఎందరో క్రైస్తవులు ఉన్నారు. కారణం ఆ వాక్యంలో జీవం లేదు. మనలో ఈ వాక్యాన్ని జీవితంగా మార్చేది దేవునిఆత్మే(పరిశుద్ధఆత్మే)!!
మీరు ఒంటరులు కారు మీకు సహాయహకున్ని పంపుతానని ప్రభువు చెప్పలేదా? ఆయన వారిపైకి, వారిలోకి, వారితో ఉన్నప్పుడు శిష్యులు జీవం కలిగి నూతన వ్యక్తులుగా అవ్వలేదా? దేవుని ఆత్మ సహయం లేకుండానే(ఆధారపడకుండానే) క్రొత్త నిబంధన జీవితాన్ని కొనసాగించాలనుకోవటం ఎంత బుద్దిహీనత!

మృతులలో నుండి యేసును లేపినవాని "ఆత్మ" మీలో నివసించినయెడల, మృతులలో నుండి క్రీస్తుయేసును లేపినవాడు చావునకులోనైన మీ శరీరములను కూడ మీలో నివసించుచున్న "తన ఆత్మ" ద్వారా జీవింపజేయును.(రోమా 8:11)

క్రీస్తులో ఉన్న కృప ద్వారా ఎండిపోయిన క్రైస్తవ జీవితానికి ఉపిరి(జీవం) పొసేది పరిశుద్దాత్ముడే! వాక్య జ్ఞానాన్ని బట్టి అతిశయపడొద్దు..మోసపోవద్దు!జీవంలేని వాక్య జ్ఞానం వ్యర్థం.