27 June 2017

✴ఆదిమ సంఘంలో దేవుణ్ని నమ్మినవారంతా ఏక మనసుతో ఉన్నారు. భూములైనా ఇండ్లయినా ఉన్నవారు వాటిని అమ్మి వాటి వెల తెచ్చి అపొస్తలుల పాదాల దగ్గర పెట్టారు. అపొస్తలులు అవసరమున్న ప్రతి ఒక్కనికి ఆ డబ్బును పంచేవాళ్ళు.
అయితే అననీయ అనే ఒక వ్యక్తి తన భార్య సప్పీరాతో కలిసి పొలం అమ్మాడు. భార్యకు తెలిసే అతడు ఆ డబ్బులో కొంత దాచుకొని, కొంత తెచ్చి అపొస్తలుల పాదాల దగ్గర పెట్టాడు.

పేతురు-"అననీయా, నీ భూమి ఖరీదులో కొంత దాచుకొని సాతాను ప్రేరణకు లొంగి పరిశుద్ధాత్మను ఎందుకు మోసగించావు? అది నీ దగ్గరున్నపుడు నీదే గదా? అమ్మిన తర్వాత ఆ డబ్బు నీ ఆధీనంలోనే ఉంది కదా! నీవు మనుషులతో కాదు దేవుని తోనే అబద్ధమాడితివి"
అననీయ ఈ మాటలు వింటూనే కుప్పకూలి ప్రాణం విడిచాడు.✴

✔ అపొస్తలులు దేవుని పరిశుద్ధాత్మచే నింపబడి,ఆత్మ ద్వారా నడిచే వ్యక్తులు. అననీయ దేవుని సన్నిధిని చులకనగా చూశాడు, నటించాడు. మనుష్యుల ముందు నటిస్తున్నానని అనుకున్నాడు కాని దేవుని సన్నిధిని గుర్తించలేకపోయ్యాడు. దేవుణ్ని హృదయపూర్వకంగా అనుసరించే ఉద్దేశ్యంలేని వారు, దేవుని హస్తం బహు బలంతో పనిచేసే చోట/వ్యక్తులకు దూరంగా ఉండటమే శ్రేష్ఠము. అపొస్తలుల వంటి రగిలే సంఘములో ఉండి, ఇలాంటి జీవితం జీవించి ప్రాణాలు కోల్పోయాడు. భక్తిలేని, దేవుని ఆత్మ బలంగా పని చెయ్యని మరొక సంఘంలో ఉన్నట్లే అననీయ బ్రతికి ఉండేవాడు. నేడు సంఘాల్లో భక్తిహీనులు ఇలాగే బ్రతికేస్తున్నారు.

✔ ప్రాముఖ్యంగా దేవుని సన్నిధికి అత్యంత దగ్గరగా జీవించేవారు, మరి ఎక్కువ ప్రమాదానికి దగ్గరగా ఉన్నవారు(బుద్ధిపూర్వకంగా అవిధేయులైనప్పుడు).
అహరోను కుమారులు(లేవి 10:1), ఏలి కుమారులు(1సమూ 2:22), ఉజ్జా(2సమూ 6:7), ఉజ్జియా(2దిన 26:19), ఇస్కరియోతు యూదా(మత్తయి 26:24) జీవితాలు.
వీరంతా దేవుని అతి పరిశుద్ధమైన సన్నిధికి దగ్గరగా ఉన్న మనుష్యులే కాని అవిధేయులు. కాబట్టే వారందరూ దేవుడు శిక్షలోకి వెళ్లారు.

❇ అంటే పాపము చెయ్యనివారే దేవుని సన్నిధికి దగ్గరగా ఉండాలా? కాదు! పాపాన్ని చులకనగా తీసుకొననివారుగా, పాపంతో పోరాడేవారుగా ఉండాలి! దేవుడు బలహీనుడ్ని, అవిధేయుడ్ని వేరుగా చూస్తాడు.

☑ బలహీనతలో పోరాటం ఉంటుంది(పాపమునుండి బయటకి రావటానికి). పాపంలో పడినప్పుడు దుఃఖం ఉంటుంది. దేవుని సన్నిధిలో గోజాడటం ఉంటుంది. వారు దేవుని రూపంలోకి క్రమేపి మారతారు. అట్టి వారికి దేవుడు సహాయకుడు.

☑ అవిధేయతలో దేవుని పట్ల చులకనితనం, కప్పిపుచ్చుకోవటం, సమర్ధించుకోవటం, దేవుని పరిశుద్ధులతో పోరాటంలాంటివి ఉంటాయి. అలాంటి వారు దేవుని వైపు తిరగరు. వీరు దైవవిరోధులు.

🕎 నీ పాప బలహీనతలో పోరాటం ఉందా? దేవుని పరిశుద్ధతని మనఃపూర్వకంగా ఆపేక్షిస్తున్నావా?