8 July 2017

◆ జాలరియైన సీమోను పేతురు, అతనితో ఉన్నవారు రాత్రంతా కష్టపడినా ఒక్క చేప కూడా పడలేదు.ప్రొద్దున్నే వారు నిరాశతో తమ వలలు కడుగుతుండగా, యేసు వారి దగ్గరకు వచ్చి ఖాళీగా ఉన్న ఆ పడవను అడిగి, దానిలో కూర్చోని ప్రజలకు భోధించాడు.

ముగించిన తర్వాత ఆయన పేతురును చూచి, పడవను లోతుకు తీసుకెళ్లి వల వేయమని చెప్పాడు. పేతురు దేవుణ్ని నమ్మి అలాగే వల వేయగా విస్తారంగా చేపలు పడ్డాయి. అప్పుడు పేతురు-"ప్రభూ, నేను పాపాత్ముణ్ణి, నన్ను విడిచి వెళ్ళు" అన్నాడు.
యేసు-"భయపడకు! ఇప్పటి నుంచి నీవు మనుషుల్ని పట్టే వాడివవుతావు! నాతో రా!" అన్నాడు. ◆

✔ పేతురు నీతిమంతుడు కాదు! కాని యదార్థవంతుడు.
అంటే దాపరికం లేకుండా, తన స్థితిని ఉన్నది ఉన్నట్లుగా ఒప్పుకునే వాడని అర్ధం. యేసు అనేకులను కలుసుకున్నాడు, అద్భుతాలు చేశాడు కాని అందరూ తమ స్థితిని యదార్థంగా ఒప్పుకున్నవారు కారు. అతి కొద్దిమంది మాత్రమే యదార్ధవంతులుగా ఉన్నారు (ఉదా౹౹ జక్కయ్య, సమరయ స్త్రీ, వ్యభిచారిణియైన స్త్రీ)

✔ మనం దేవుని వైపు చూసిన వెంటనే, మన నిజస్థితి మనకు స్పష్టంగా తెలుస్తుంది. దేవుణ్ణి దగ్గర నుండి చూసినవారు దేవుని పరిశుద్ధత ముందు తమ మురికి స్థితిని గుర్తించగల్గుతారు. (యెషయా 6:5, ప్రకటన 1:17).
పరిశుద్ధుడైన దేవుని సన్నిధిలో నిలిచి ఉండటానికి కావాల్సింది నీతిక్రియలు కాదు! యదార్థత!! మన వద్ద నుండి దేవుడు కోరుకునేది అదే. ఐతే తన స్థితి నుండి లేచి దేవుని పరిశుద్ధతలోకి ప్రవేశించాలని దేవుడు ఆహ్వానిస్తాడు.ఆ యదార్థతే ఆ వ్యక్తిని దైవనీతిలోకి నడిపిస్తుంది.

✔ పరలోకరాజ్యం యదార్థవంతులైన పాపుల చేత నిండి ఉంటుంది(క్రీస్తు నీతిని బట్టి). అలాంటి దేవుని రాజ్యం గూర్చి ప్రకటించేవారు, తమ స్థితిని మరి ఎక్కువగా యదార్ధంగా గ్రహించి, ఒప్పుకునే వారినే దేవుడు వాడుకొంటాడు.

✔ పేతురు కంటే, జ్ఞానవంతులు, లేఖన పండితులు, బయటికి నీతిపరులు, ధర్మశాస్త్రన్ని అక్షరానుసారం పాటించేవారు (ఎదుటివారి దృష్టికి, తమ దృష్టికి తాము నీతిమంతులు) ఎందరో ఉన్నారు. వారు వాళ్ళ వ్యర్ధాతిశయాలతో నిండి ఉన్నారు. ఇక దేవుడు నింపడానికి చోటేది? కనుకనే దేవుడు వారిని దాటిపోయ్యాడు. నేడూ కూడా దాటిపోతాడు.

✔ పేతురు తనను తాను ఖాళీ చేసుకున్నాడు కాబట్టే దేవుని చేత నింపబడ్డాడు. అలాంటి వారితోనే దేవుడు స్నేహం చేస్తాడు. తన పనిలో వాడుకుంటాడు. ఒకవేళ వాళ్ళు అప్పుడు గర్విస్తే వారిని సైతం పక్కన పెట్టేస్తాడు(రోమా 11:18,22).

❇ ఆయన అతిశయించే వారిని(అహంకారులను) త్రోసి వేసి దీనులకు కనికరం చూపు దేవుడు.