12Mar2018

శోధన:

■ 'శోధన'౼ అనగా ఒక విశ్వాసి పాపం చెయ్యడానికి ప్రేరేపించబడటం. విశ్వాసిని దేవుని నుండి(ఆయన వాక్యంలో నిలువకుండా) వైదొలిగించడానికి సాతాను పన్నే వల. సహజంగా మనం దేవుణ్ని తెలిసికొనక మునుపు ఏ పాపాలను ఇష్టంగా చేస్తామో..ఆ విషయాలనే శోధనకు సాధనాలుగా సాతాను వాడుకుంటాడు. పూర్వం మనకు ఉన్న దురాశలను అనుసరించి నడుచుకొనునట్లుగా ప్రేరేపిస్తాడు (ఎఫె 4:22, తీతు 3:3). 'శోధన' అనేది ప్రతి విశ్వాసికీ సహజంగా కలిగే అనుభవమే! ఇది దేవుని అనుమతితోనే మనకు వస్తాయి. మనం భరింపదగిన దాని కంటే-అనగా మన శక్తికి మించిన శోధనా బలాన్ని మన జీవితంలో ఆయన అనుమతించడు(1కోరింథి 10:13). ఇందులో దేవుని ఉద్దేశ్యం మనల్ని మరింత బలవంతులుగా చెయ్యాలనే కానీ పాపంలో పడటం ఆయన చిత్తం కాదు! 'శోధించబడటం'(పాపపు ప్రేరణ రావటం) తప్పు కాదు, కాని ఆ ప్రేరణకు లొంగి ఆ పాపంలో పడి అపవాదితో ఏకీభవించడం 'పాపం'. శోధన జయించిన ప్రతిసారి మనకు మరికొంత ఆధ్యాత్మిక బలం తోడౌతుంది.

■ ఒకవేళ మనం శోధనలో పడినప్పుడు, వెంటనే దేవుని కృపా సింహాసనాన్ని ఆశ్రయించి ఆ పాపాన్ని వెంటనే కడిగివేసుకోవాలి(1యోహా 2:1). బలహీనతలను (పుర్వపు పాపాలను) చులకనగా తీసుకోక, వేటి విషయంలో నాకు రక్షకుడు అవసరం అని తీర్మానం చేసుకున్నావో (ఆయన రక్తంలో కడుకున్నావో), ఆ రక్షకుణ్ణి ఆశ్రయించి, ఆయన బలంతోనే పాపంతో పోరాటం కొనసాగించాలి(హెబ్రీ 12:4). మన సొంత రక్షణను నిర్లక్ష్యం చేయక, శోధనలో క్రీస్తు యోధునిగా, సర్వాంగ కవచం ధరించుకొని, పాత స్వభావంతో, లోకంతో, అపవాదితో పోరాటం చేయాలి. దేవుని ఆత్మే మనకు సహాయకుడని మరువకూడదు (యోహా 14:26). మనం క్రీస్తు సారూప్యంలోకి మారడానికి దేవుడు తాను ఇవ్వవలినవి మొత్తాన్ని అంతా విశ్వాసికి అనుగ్రహించేశాడు(2 పేతు 1:2, ఎఫె 1:3). విశ్వాసంతో దేవుని వాగ్ధానాలను స్వతంత్రించు కోవడం విశ్వాసి భాద్యతే! మనమంతా జయశీలులుగా ఉండాలనేది మన పట్ల దేవుని చిత్తం. నిజమైన విశ్వాసి ఎవ్వడూ పాపంలో ఆనందించలేడు.గాని ఆ పాపంలో పడిపోయినందుకు దుఃఖపడతాడు. (పాపాన్ని స్నేహించడానికి ఇష్టపడని) దైవచిత్తానుసారమైన దుఃఖం క్రీస్తు కృపలో స్థిరంగా నిలవడానికి దారితీస్తుంది(2 కోరింథి 7:9).

■ శోధనలో పడిపోవడం అనే విషయాన్ని చులకనగా తీసుకుంటే కొన్ని రోజులకు తప్పు చేస్తున్నామన్న భావన మనలో నుండి దూరమౌతుంది. మొదట్లో పాపంలో పడినప్పుడు కలిగిన దుఃఖం కొన్ని రోజులకు సమసిపోతూ ఉంటుంది(ప్రక 3:15). అప్పుడు మన మనసాక్షి శుభ్రంగా లేకుండా, దేవుని ఆత్మకు లోబడకుండా తిరుగు తున్నామని గ్రహింపుకు రావాలి. అలా విశ్వాసి మెల్లగా (అపవాది) తిరిగి తన శరీర యెలుబడికి రహస్యంగా వెళ్లగలడు (హెబ్రీ 6:1-20). అలా కొనసాగడానికి ఇష్టపడేవారు దానిని సమర్ధించుకోవడానికి కారణాలను వెతకుతారు. దేవుని వాక్యం దీనిని ఆత్మీయ వ్యభిచారంగా చెప్తుంది (యకో 4:4). అనగా క్రీస్తును వివాహం చేసుకొని, ఈ లోకంతో రహస్యం సాంగత్యం కోరుకోవడం. ఇది విశ్వాసికి సాధ్యమే! అప్పుడు దేవుడు విశ్వాసి స్వేచ్ఛను గౌరవిస్తూనే, ప్రేమతో గద్దిస్తూనే తిరిగి రమ్మని పిలుస్తుంటాడు.

★ శోధన౼పాపం పట్ల విశ్వాసి వైఖరిని దేవుని యెదుట బహిర్గతం చేస్తుంది. పోరాడుతూ, జయించు వారు ఒక రోజు దేవుని యెదుట ప్రతిఫలం పొందుతారు (ప్రక 2:17). అన్నీ విధాల శోధనల్లో జయాశీలనిగా నిలిచిన 'యేసు' అనే ఒక సంపూర్ణ నరుడు మనం ముందు మాదిరిగా నిలచివున్నాడు. ఆయన మనకు సహాయకుడు.