22May2020

✴ ఫిలిష్తీయుల సైన్యంలోనుండి గొల్యాతు అనే బలశాలి బయలుదేరాడు. అతని ఎత్తు ఆరు మూరల ఒక జానెడు. అతడు తన తలపై కంచు శిరస్త్రాణం ధరించాడు. అతడు యుద్ధ కవచం పెట్టుకున్నాడు. కవచం బరువు 57 కిలోలు.
అతని కాళ్లకు కంచు కవచం, అతని భుజాల మధ్య ఒక కంచు బల్లెం ఉన్నాయి. అతని చేతిలోని ఈటె, చేనేత పనివాడి అడ్డకర్ర అంతపెద్దది. ఈటె కొన బరువు 7 కిలోల ఇనుమంత బరువు. ఒక సైనికుడు బల్లెం మోస్తూ గొల్యాతు ముందు నడుస్తున్నాడు..

దావీదు-"యెహోవా కత్తిచేత, ఈటెచేత రక్షించేవాడు కాదని ఇక్కడ ఉన్నవారంతా తెలుసుకుంటారు. యుద్ధం యెహోవాయే చేస్తాడు"(1సమూ 17:4-7,47) ✴

■ గొల్యాతు యొక్క రూపు, బలం వర్ణన ఎంతో గొప్పగా వివరించబడింది. గొల్యాతుతో పోల్చితే దావీదు అత్యంత స్వల్పమైన,బలహీనమైన వ్యక్తిగా కనిపిస్తాడు. కానీ కధ ముగింపుకు దావీదు చేతిలో గొల్యాతు ఎవరూ ఊహించని రీతిలో చంపబడతాడు. ఇది దావీదు శక్తితో లేక బలంతో జరిగిందా? కాదు..
రాజైన సౌలు, ఇశ్రాయేలీయులు దేవుని వైపు చూడకయే గొల్యాతు దేహదారుఢ్యాన్ని చూసి భయపడ్డారు. కానీ దావీదు బలశాలియైన దేవుని బలం వైపు తీక్షణంగా చూస్తూ, ఆయన బలాన్ని సరిగ్గా అంచనా వేశాడు. విర్రవీగిన శత్రువు బలాన్ని అణచి విశ్వాసిని విజేతగా దేవుడు చేశాడు.

■ ఇది సరిగ్గా మనలో తిష్టవేసిన, బలమైన పాపపు బలహీనతలు మనపై విర్రవీగుతున్న దానిని సూచనగా చెప్పవచ్చు. మన శరీర క్రియలను జయింపజేయువాడు, సమస్త పాపములపై విజయుడైన యేసు అను రక్షకుడు మనకు ఉన్నాడని మనం దావీదు వలె నమ్మాలి. బలాశాలియైన దేవుడు మన శరీరంలోని పాపపు ప్రభుత్వం(యేలుబడి) కంటే గొప్పవాడని మనం విశ్వసించాలి.

■ లోకమును జయించేది దేవుని యందలి మన విశ్వాసమే! దేవుడు ఈ పాపపు బలహీనతల నుండి నన్ను విడిపిస్తాడు అని నమ్మాలి. ఒకవేళ ఈ విశ్వాసంలో బలం చాలకపోతే, దానిని అనుగ్రహించుడైన దేవుని సహాయం ధారాళంగా మనం కోరవచ్చు. ఆయనే మన విశ్వాసాన్ని అంచెలంచెలుగా వృద్ధిచేసి పరిపూర్ణతలోకి నడిపిస్తాడు. కనుక నీ బలహినత అది ఏదైనా కావచ్చు..అది దేవుడు కూడా విడిపించలేనిది అన్నట్లు ప్రవర్తించి దేవుని శక్తిని అవమానించొద్దు..
దేవుడు మన విశ్వాసాన్ని వృద్ధిచేయును గాక!