26Feb2018

❇ పౌలు బర్నబాతో౼“ఏ ఏ పట్టణాల్లో ప్రభువు వాక్కు ప్రకటించామో ఆ ప్రతి పట్టణంలో ఉన్న సోదరుల దగ్గరికి తిరిగి వెళ్ళి, వారెలా ఉన్నారో చూద్దాం” అన్నాడు. అప్పుడు 'మార్కు' అనే పేరున్న యోహానును వెంటబెట్టుకొని వెళ్ళడానికి బర్నబా ఇష్టపడ్డాడు. అయితే పౌలు పంఫులియలో పరిచర్యకు తమతో రాకుండా విడిచి వెళ్ళిపోయిన వాణ్ణి వెంటబెట్టుకొని పోవడం భావ్యం కాదని తలంచాడు. ఇద్దరి మధ్య తీవ్రమైన భేదాభిప్రాయం రావడంతో వారు ఒకరి నొకరు విడిచి వేరైపోయారు. (అపో 15:36-41)❇

■ "బర్నబా" భక్తిపరుడునూ,ఆదరణ చూపటంలో ఆసక్తిపరుడుగా కనిపిస్తాడు (అపో 4:36,37). ఒకప్పుడు క్రూరుడైన సౌలు(పౌలుగా) మారాక ప్రతి ఒక్కరూ అతన్ని నమ్మక, భయపడి దూరంగా ఉన్నప్పుడు,బర్నబానే అతణ్ణి ఆదరించి అపొస్తలులకు పరిచయం చేశాడు(అపో 9:27). ఆదరించే అతని స్వభావాన్ని బట్టి "బర్నబా" అని అపొస్తలులే అతనికి పేరు పెట్టారు.పౌలు దేవుణ్ని ఎంతో శ్రద్ధగా వెంబడించే వానిగా ఉన్నాడు(zealous for GOD) . క్రీస్తును ఎంత బలంగా ద్వేషించాడో, దేవుడు అతనికి కనపర్చుకొన్న తర్వాత అంతే ప్రేమతో, భయభక్తులతో క్రీస్తును సేవించాడు. క్రీస్తును ధరించుకోవడం కొరకు, తన పట్ల దేవునికున్న ఉద్దేశ్యాల నెరవేర్పు కొరకు ఆకలిదప్పులుగా భావించాడు.
పౌలు-బర్నబాలు మొదటి ప్రయాణంలో బర్నబాకు దగ్గర బంధువైన మార్కును కూడా వెంట తీసుకొని వెళ్లారు.కారణాన్ని దేవుడు వ్రాయించలేదు గాని మార్కు వారిని, దేవుని పరిచర్యను మధ్యలో వదిలివేసి వెళ్ళాడు.ఐతే అది అంత ఆమోద యోగ్యమైనది కాదని, పౌలు బలమైన నిర్ణయాన్ని బట్టి తెలుసుకోవచ్చు. యవ్వనుడైన పౌలులో క్రీస్తు రూపం సంతరించుకుంటున్న దినాలవి. పౌలు దేవుని రూపాన్ని తర్వాత తరాలకు చూపే వ్యక్తిగా రూపుదిద్దుకుంటున్నాడు.

■ పౌలు మార్కును ద్వేషిస్తున్నాడా? రెండవ అవకాశాన్ని ఇవ్వక కృప లేకుండా ప్రవర్తిస్తున్నాడా(పరిసయ్యులు పాపిని నిలదీసినట్లుగా)!?..కాదు! పౌలు దైవికమైన క్రమశిక్షణ చేస్తున్నాడు. పాపాన్ని ఈ క్రింది విధంగా చెప్పవచ్చు.
i. ఒక వ్యక్తికి దైవికమైన వెలిగింపు లేకుండా(దేవుని వాక్యం తెలియక) చేసే అవిధేయత.
ii. కొందరికి వాక్యానుసారం ప్రవర్తించాలనే మనస్సు ఉన్నా  బలహీనత చొప్పున(మునుపు ఉన్న పాపపు బలం చేత) పడిపోయే పాపం.వీరి మనస్సు నిండా దేవుని కొరకు నిలబడాలనే తృష్ణ ఉంటుంది కాక శక్తి చాలక పడే పాపం.
iii. వెలిగింపు(దేవుని ఒప్పింపు) ఉన్నా చులకనగా చూసి ధిక్కరించే పాపం ఉంటుంది. బుద్ధిపూర్వకమైన తమ స్వేచ్ఛతో అవిధేయత!

◆ మొదటి తప్పుకు కృపా, ప్రేమతో సత్యాన్ని చెప్పే వారిగా, పాపం నుండి బయటకు తెచ్చే సహాయకులంగా నిలవాలి. (క్రీస్తు పాపులతో స్నేహితునిగా వారిని దేవుని మార్గానికి త్రిప్పినట్లుగా)
◆ రెండవ తప్పుకు విశ్వాసిని బలపరచే ఊతగా మరొక బలమైన విశ్వాసి నిలవాలి. ఎందుకంటే నేడు బలవంతుడిగా(యవ్వనుడిగా) ఉన్న ప్రతి విశ్వాసి అలాంటి పరిస్థితుల ద్వారా స్థిరపర్చబడినవాడే!(క్రీస్తు పేతురును బలపరచినట్లుగా)
◆ మూడవ తప్పుకు దైవికమైన క్రమశిక్షణ చెయ్యాలి. మేలుకోరి గద్దించడం, తప్పు తెల్సుకొని తిరిగి వచ్చేవరకు వారి స్వేచ్ఛకు విడిచి పెట్టడం, సహవాసం నుండి దూరంగా ఉంచడం లాంటివి.ఇవి ప్రేమలేని తనం కాదు గాని ఆ వ్యక్తిని హృదయపూర్వకంగా ప్రేమించి, తిరిగి దేవునిలో సరి చేసుకోవడానికి ఇచ్చే మౌన సమయం.(క్రీస్తు పరిసయ్యులను, మత పెద్దలను హెచ్చరించినట్లుగా)
ఇది దైవవిధానం.పైన చెప్పిన వారంతా దేవునికి అవిధేయులే కానీ వారితో ఆయన ప్రవర్తించిన తీరు భిన్నమైనది.

■ ఇక్కడ పౌలు మార్కు విషయంలో మూడవ విధానాన్ని అవలంభించాడు. తర్వాత రోజుల్లో సరి చేసుకున్న మార్కును మళ్ళీ పౌలు చేర్చుకున్నాడు. మళ్ళీ సంఘాలు అతన్ని చేర్చుకోవాలని పత్రికలు వ్రాశాడు. తర్వాత కాలంలో ఈ మార్కునే పౌలు సేవలో ఎంతో ఉపయోగకరంగా మారాడు, మార్కు సువార్తను అతనే వ్రాశాడు (కొలస్సి 4:10, 2తిమో 4:11, ఫిలేమో 1:24). దేవునితో నడచే వ్యక్తులు చేసే క్రమశిక్షణలో పగ, ప్రతీకారాలకు అతీతంగా ఆత్మీయ మేలు ఉంటుంది. ఈ సంఘటన అంతరం ఇక అపొస్తలులు కార్యములు గ్రంథంలో బర్నబా పేరు కనిపించదు. సంఘం, పరిశుద్ధాత్ముడు పౌలుతో ఏకీభవిస్తున్నట్లుగా కనబడుతుంది(అపో 15:40,41). మన ప్రేమ కృపలు మానవ జ్ఞానంలో నుండి కాక దైవవాక్యానుసారంగా, అది కూడా సరైన అన్వయింపుతో కొనసాగాలి.