12Apr2018

✴️ ప్రవక్తల బృందంలో ఒకని భార్య ఎలీషాను చూచి ఇలా మొర పెట్టింది.
౼“మీ సేవకుడైన నా భర్త చనిపోయాడు. ఆయనకు యెహోవా అంటే భయభక్తులని  మీకు తెలుసు గదా. మాకు అప్పిచ్చిన వాడు వచ్చి నా ఇద్దరు కొడుకులను బానిసలుగా తీసుకుపోవాలని ఉన్నాడు.”
 ఎలీషా౼“నేను నీకు ఎలా సహాయం చేయాలి? నీ ఇంట్లో ఏం ఉన్నదో నాకు చెప్పు” అన్నాడు. అందుకామె౼“మీ దాసురాలైన నా ఇంట్లో ఒక కుండ నిండా నూనె తప్ప ఇంకేమీ లేదు” అంది. ఎలీషా ౼“నీవు బయటికి వెళ్ళి నీ పొరుగువాళ్ళందరి దగ్గర దొరకగలగినన్ని ఖాళీ పాత్రలు ఎరవుగా తెచ్చుకో. అప్పుడు నీవు నీ కొడుకులను ఇంట్లోకి వెళ్ళి తలుపు మూసివేసి, ఆ పాత్రలన్నిట్లో నూనె పోయండి. నిండిన వాటిని ప్రక్కన పెట్టు”....
ఆమె ఆ విధంగా చేసి, ఆ పాత్రలు నిండిపోయినప్పుడు ఆమె “ఇంకో పాత్ర తీసుకురా” అని కొడుకుతో చెప్తే అతడు “ఇంకొకటి లేదు” అన్నాడు. వెంటనే కుండలో నుండి నూనె సరఫరా నిలిచింది. ఆమె వచ్చి ఎలీషాకు ఆ విషయం తెలియజేసింది. ఎలీషా౼“నీవు వెళ్ళి ఆ నూనె అమ్మి అప్పు తీర్చు. మిగిలిన దానితో నీవూ, నీ కొడుకులూ బ్రతకండి” అన్నాడు. ✴️

■ ఒకని జీవితం ఎంత చెడిపోయి, నిరీక్షణ లేని స్థితిలో ఉన్నప్పటికీ ఉన్నపాటున దేవుని దగ్గరకు వచ్చినప్పుడు ఆయన అంగీకరించి బాగుచేస్తాడు. ఏదెను నుండి ఇప్పటికి వరకు ఆయన స్వభావం ఇదే! లేఖనాలు ఇలాంటి ఉదాహరణలతో నిండి ఉన్నాయి. ప్రభువు పాడైపోయిన వాటిని మరళా కట్టే దేవుడు. మన సొంత నిర్ణయాలు('నేను' అనే యెలుబడి) పాపానికి, అనేక ఇబ్బందులకు కారణం. మానవుని జీవితం(ప్రాణాత్మ దేహాలు) దేవునితో ముడిపడిన్నట్లుగా దేవుడు అతణ్ణి నిర్మించాడు. ఎప్పుడైతే నిర్మించబడిన ఆ ఉద్దేశ్యంలో నుండి మనం  వైదొలుగుతామో, అనగా నా జీవితంపై నా యెలుబడి చేయడం ద్వారా 'నా జీవితం నేను కొనసాగింపగల సమర్థున్ని, నేను దేవుని కంటే శ్రేష్ఠుణ్ని' అనే అహాన్ని తెలియజేస్తుంది. ఏదెనులో మొదటి పాపానికి కారణం కూడా ఇదే. ప్రతి విషయం దేవునితో మాట్లాడటం, దేవునిపై ఆధారపడటం చిన్న బిడ్డల్ని పోలిన మనస్సు. పిల్లల జీవితంలో ప్రతి శ్రేష్టమైన విషయాలు తల్లిదండ్రులు వివేచించినట్లు పరమ తండ్రి మన గురించి జాగ్రత్త తీసుకుంటాడు. ఆయన నడిపే ప్రతి స్థలం మన మేలు కొరకే! విశ్వాసి ఆత్మీయ-భౌతిక ప్రతి అవసరాలు ప్రభువు సన్నిధిలో ఉంచడం శ్రేష్ఠమైన సంగతి. ఎలీషా ద్వారా దేవుడు జరిగించిన ఈ అద్భుత కార్యం, శిష్యుడైన ప్రవక్త అవసరంలో ఉన్నప్పుడు ఎలీషా దగ్గరకు వచ్చినట్లైతే దేవుడు చేయలేడా? చేయగలడు. మనం దేవుణ్ని ఆశ్రయించక పోవడమే మన జీవితంలో అనేక సమస్యలకు కారణం.

■ అలా విశ్వాసంతో ఉన్నపాటున దేవుని సన్నిధికి వస్తున్ననప్పుడు మనం దేవుని శక్తిని నమ్మాలి. ఇప్పుడు నీలో వేటినైతే చూసి 'నేను అసమర్థుడను' అని భయపడుతూ నిరీక్షణ కోల్పోయావో అదే విషయాలను దేవుడు బాగు చెయ్యగలడని, ఆయనకు సమస్తమూ సాధ్యములేనని (అసాధ్యమైనది ఏదీ లేదని) నమ్ముతున్నావా? (About specific Will of God for individual lives) ఆ స్త్రీ తనకు నచ్చిన విధానంలో ఆ సమస్య నుండి బయటికి రావడానికి ప్రయత్నాలు చేసి నేను విశ్వాసం ఉంచుతున్నాను, దేవుడు నన్ను బాగు చెయ్యగల సమర్థుడు అనకూడదు. అప్పుడు మరోసారి ఆ కుటుంబం విఫలమైవుండేది. విశ్వాసం అంటే అది కాదు. దేవుడు నీతో చెయ్యమని చెప్పిన మాట౼అది నమ్మడానికి ఎంత కష్టమైన ఆయన చెప్పాడు గనుక చేయగల సమర్థుడని నమ్మడం. ఆమెతో దేవుడు చెప్పాడు, నూనెను పాత్రలలో నింపి ఆ సమస్య నుండి బయటపడమన్నాడు. విశ్వాసంతో ఆమె అలా చేసి దేవుని పనిని తన జీవితంలో చూసింది. దేవుడు అబ్రాహాముతో పిల్లలను ఇస్తానని చెప్పిన మాట, కష్టతరమైనప్పటికీ అతను విశ్వాసముంచి పొందుకున్నాడు. ఒకవేళ దేవుడు అబ్రాహాముతో ఆ మాట చెప్పకపోయినట్లైతే అతడు విశ్వాసముంచినా, అది జరిగేది కాదు. ఆయన చెయ్యగలడని నేను నమ్ముతున్నాను, అని దేవుడు 'నీతో చెప్పని' మాటను నమ్మడం విశ్వాసం కాదు, అప్పుడు ఇంకను నీ సొంత మార్గాల్లో దేవుణ్ని వేతకడమే అవుతుంది. దేవుని చిత్తానుసారంగానే మనం ప్రార్ధించాలి, విశ్వాసముంచాలి. అంటే ఉన్నపాటున దేవుని వద్దకు వచ్చి, పసిబిడ్డలా తండ్రి చేతిలో ఓదగటం. ఆయన ఏం చెప్తే ఆ ప్రకారం నడుచుకోవాల నుకోవడం. మన జీవితం అంతటిపై ఆయన అధికారాన్ని సంపూర్ణంగా ఒప్పుకోవడం.

౼(About revealed Will of God for all) మనం జయించలేక, ఓడిపోతున్న ప్రతి పాపాన్ని దేవుని సన్నిధిలో పెడుతూ, దేవుడు విడిపించగల సమర్థుడని మరళా మరళా చెప్పటమే విశ్వాసం (రోమా 6:14). విశ్వాసంలోనే విజయం ఉంది. నీవు నీవైపు చూడక శక్తిమంతుడైన దేవుని వైపు చూస్తూ, మన శక్తిని శూన్యం చేసుకుని దైవ శక్తినే మన బలంగా మార్చుకునే జీవితం. పాపం చేసినప్పుడు దేవుడు విశ్వాసి మనస్సును గమనిస్తాడు. అందులోనే బయటకు రావాలనుకుంటున్నాడా? లేక కారణాలు చూపిస్తూ ఆనందించాలను కుంటున్నాడా? ఈ మాటలన్నీ పాపం నుండి బయటకు వచ్చి, క్రీస్తును పోలి నడచుకోవాలనుకునే వారి కోసం మాత్రమే!