30Oct2017

❇ రాజైన అహష్వేరోషు ద్వారం దగ్గరవున్న సేవకులందరూ 'హామాను'కు వంగి నమస్కారం చేయాలని రాజాజ్ఞను జారీ చేశాడు. కనుక వాళ్ళంతా అలా చేశారు. కానీ, యూదుడైన 'మొర్దెకై' వంగలేదు, నమస్కారం చేయనూ లేదు. కనుక హామాను ఆగ్రహంతో నిండిపోయాడు. అతణ్ని ఒకణ్ణే చంపడం చిన్న సంగతి అనుకొన్నాడు, కనుక అతను ఏ జాతికి చెందాడో ఆ జాతివారందరినీ (యూదులందరినీ) నాశనం చేయడానికి అవకాశంకోసం వెదకసాగాడు. మరియు యాభై మూరల ఎత్తు గల ఉరికొయ్యను మొర్దెకై కొరకు చేయించాడు. రాజు అనుమతి కోసం యుక్తిగా సిద్ధపడ్డాడు.

ఆ రాత్రి రాజైన అహష్వేరోషుకు నిద్ర పట్టలేదు. గనుక రాజ్య చరిత్ర గ్రంథం తెప్పించి చదివి వినిపించమని సేవకులకు ఆజ్ఞ జారీ చేశాడు. ఒక్కప్పుడు మొర్దెకై రాజుగారి ప్రాణాలను తీయాలని కుట్ర పన్నిన వారిని పట్టించాడు కానీ అప్పుడు అతని మేలును రాజు గుర్తించలేదు. ఇప్పుడు మొర్దెకై చేసిన దాని గూర్చి రాజు విని, అతనికి ఏమి చేయలేదని గుర్తెరిగి..

రాజవస్త్రాలనూ ధరింపజేసి, రాజు యొక్క గుర్రం మీద అతణ్ణి ఎక్కించి నగర వీధుల్లో బహిరంగంగా ఘనపర్చాడు. ఈ పని అంతా హామాను చేత చేయించాడు. హామాను మొర్దెకై జాతిని నాశనం చెయ్యాడానికి కుట్ర పన్నాడని, అతని కోసం ఉరి కొయ్యను సిద్ధం చేశాడని రాజు తెల్సుకొని, అదే ఉరికొయ్యపై హామాను చంపించాడు. ❇

■ మనుష్యులందరూ దేవుని ఆధీనంలో ఉన్నారు. ఆధిపత్యాలను, అధికారాలను ఆయన ఏ క్షణంలోనైనా తారుమారు చేయగల సమర్థుడు.ఒకనికి ఇవ్వగలడు, అది తీసివేయ్యగలడు. అధికారం అనే మత్తులో ఉన్నప్పుడు, మనందరిపై హెచ్చుగా ఉన్న సర్వోన్నతుని దేవుని సింహాసనాన్ని అధికారాన్ని మర్చిపోయి౼'అంతా నా చేతిలోనే ఉందనే' భ్రమలోకి నడిపిస్తుంది(ప్రక18:7-10, లూకా12:20).అంతం లేని కాలాల్లో మనుషులను,రాజ్యాలను, దేశాలను పరిపాలన చేస్తున్న రారాజు దేవుడు!

■ 'హామాను' తన అధికారాన్ని ధిక్కరించిన వారిపై విషపు చూపు చూసే..దైవ భయం లేని వ్యక్తి. ఒకవేళ సరిద్దిద్దు కోవడానికి ఇష్టపడని ఇతని కఠిన వైఖరిని బట్టి, ఇతని అంతం కొరకే దేవుడు 'మొర్దెకై'ని ఇతని జీవితంలోకి పంపాడేమో అనిపిస్తుంది! విషపు చూపులకు, కుయుక్తులకు దేవుడు విరోధి(సామె 3:32).ఆయన కన్ను ప్రతి హృదయాన్ని వివేచిస్తుంది. మొర్దెకైను దేవుడు ఎప్పుడూ ఎలా కాపాడుకోవాలో ఆయనకు బాగా తెల్సు. మొర్దెకై రాజుకు చేసిన మేలును దేవుడు ఇప్పుడు ఇలా ఉపయోగిస్తాడని మొర్దెకై కూడా ఊహించి ఉండడు.దేవుడు తన పిల్లల జీవితాల్లో ఆయన ఎంత ప్రణాళికాబద్దంగా ఉంటాడో చూడండి! నడవలేని పరిస్థితుల్లో ఎత్తుకొని నడిపించే గొప్ప తండ్రి. ఆయనను ఆనుకొని జీవించే జీవితాలను ఎన్నడూ చెయ్యి విడువడని నమ్మకమైన దేవుడు.ఆపదల్లో ఆదుకునే సహాయకుడు. మన జీవితాల్లో ఎదుటివారు చెయ్యాలని చూసే ప్రతి చెడును కూడా మేలుగా మార్చగల సమర్థుడు.

౼నిశ్చింతగా ఉండండి!నీ జీవితం దేవుని ఆధీనం(Control)లో ఉంది..మానవుల చేతిలో కాదు. బైబిల్ అంతా ఇలాంటి ఉదాహరణలతో నిండి ఉంది. దీన్ని నమ్ముతున్నావా!ఈ సత్యం గుర్తించలేని రోజుల్లో గలిబిలి అయ్యేవాడ్ని. దానికి కారకులైన మనుష్యులను నిందించే వాడ్ని. కానీ నేడైతే నా ప్రాణం దేవుణ్ని ఆనుకోని నిమ్మళంగా ఉంది. ఇది నా సాక్ష్యం! దేవుణ్ని ఆధారంగా చేసికో! అప్పుడు ఇది నీ సాక్ష్యం కూడా అవుతుంది. సర్వకాలల్లో దేవుడు మహిమ పొందును గాక!