09Aug2017

❇ ఫరో రాజుకు ద్రాక్షరసం గిన్నె అందించే సేవకుడు నేరారోపణ ఎదుర్కొకొని యోసేపు ఉన్న జైలుకు వచ్చాడు.ఒక రాత్రి అతనొక కల కన్నాడు. దాని అర్ధం తెలియక విచారంగా ఉన్నప్పుడు.. యోసేపు విషయం తెలుసుకుని ఆ కల చెప్పమన్నాడు.

ఆ సేవకుడు-"నా కలలో ఒక ద్రాక్షచెట్టు కనబడింది.
ఆ చెట్టుకు 3 తీగెలున్నాయి. నేను చూస్తుండగా ఆ తీగెలకు పూలు పూసి, ద్రాక్షాగెలలు అయ్యాయి. ఫరో గిన్నె నా చేతిలో ఉంది. నేనా ద్రాక్షపళ్ళు తీసుకొని ఫరో గిన్నెలో వాటిని పిండి, ఆ గిన్నె ఫరో చేతికందించాను"

యోసేపు౼"దాని భావం ఇదే! ఆ 3 తీగెలు 3 రోజులు. ఇంకా 3 రోజుల లోపల, ఫరో మిమ్మల్ని ఇక్కడ నుంచి విడిపించి మీ ఉద్యోగం మీకు మళ్ళీ ఇప్పిస్తాడు. 'అయితే నీకు క్షేమం కలిగేటప్పుడు నన్ను జ్ఞాపకముంచుకొని, నామీద దయచూపి, నా విషయం ఫరోతో మాట్లాడి, నన్ను ఈ ఇంటిలోనుంచి విడిపించండి. ఎందుకంటే, నన్ను అన్యాయంగా బలవంతంగా నా యింటినుండి, నా ప్రజలైన హీబ్రూవారి దేశంలో నుండి తీసుకొనివచ్చారు. అంతేగాక, ఈ చెరసాలలో నన్ను వేయడానికి ఇక్కడ కూడా నేనేమీ నేరం చేయలేదు'" అన్నాడు.యోసేపు చెప్పినట్లే 3 రోజుల్లో ఫరో అతని ఉద్యోగం మళ్ళీ ఇప్పించాడు. కాని యోసేపు విషయం ఫరోతో అతడేమీ చెప్పలేదు. అతను యోసేపుకు సహాయం చెయ్యటం మరచిపోయాడు!! ❇

యోసేపు దేవుని ప్రణాళికలో ఐగుప్తుకు తీసుకురాబడ్డాడు.కొంత మంది అతని విషయంలో అన్యాయంగా ప్రవర్తించిన మాట నిజమే! కాని దానిని కూడా దేవుడు ఆయన చిత్తానికి వాడుకున్నాడు.అతనికి హాని చెయ్యాలని చూసిన వారందరి చర్యలను దేవుడు తన ఆధీనంలోకి తీసుకున్నాడు. దేవుని చేత పంపబడినప్పుడు విడిపించగలిగిన వాడు కూడా ఆయనే కదా! శ్రమలో యోసేపు ఆ సేవకుని వైపు సహాయం కోసం చూసాడు.కాని అతను మర్చిపోయ్యాడు(దానిని కూడా దేవుడు ఆయన ఆధీనంలోకి తీసుకున్నాడు). యోసేపు ఆ సేవకుడు విడిపిస్తాడని ఎంతో ఎదురుచూశాడు. కాని అలా జరగలేదు.అప్పుడతను ఒక పాఠం నేర్చుకున్నాడు.

విడిపించే(సహాయం చేసే) హస్తం దేవునిదే కాని మానవునిది కాదు. తిరిగి యోసేపు దేవునిపై మనస్సు నిలిపాడు. 2 సం|| తర్వాత యోసేపు బయటికి రావడానికి అదే సేవకుణ్ణి దేవుడు వాడుకున్నాడు. ఆయన ఆకాశం నుండి గొప్ప సూచన ద్వారా విడిపించలేదు కాని మనుష్యులనే వాడుకున్నాడు. ఐతే విశ్వాసి చూపు సర్వశక్తుడైన దేవుని హస్తం వైపే ఉండాలి, కాని మానవ హస్తం వైపు కాదు.ఆయనదైన సమయంలో ఆయన చిత్తానుసారం ఆయన పని ఆయన చేస్తుంటాడు. విశ్వాసి విశ్వాసంతో దేవునిపై ఆనుకొనటమే 'విశ్వాసి' అనే తన పిలుపుకు తగిన జీవితం.