28 July 2017

యేసు ఒక కథ చెప్పాడు.
❇ ఒక ధనవంతుడి భూమి విస్తారంగా పండింది. అప్పుడు అతడు ఇలా ఆలోచించాడు. "నా పంట సమకూర్చుకోడానికి నాకు స్థలం చాలదు. కాబట్టి నేనేం చేయాలి? ఇలా చేస్తాను. నా కొట్లు పడగొట్టి ఇంకా పెద్దవి కట్టిస్తాను. వాటిలో నా ధాన్యమంతటినీ, నా ఆస్తి అంతటినీ దాచి నిల్వ చేస్తాను.

అప్పుడు నా ప్రాణంతో "ప్రాణమా, ఎన్నో సంవత్సరాలకు సరిపోయే విస్తారమైన ఆస్తి నీ కోసం సమకూర్చాను. సుఖపడు, తిను, తాగు, సంతోషంగా ఉండు అని చెప్తాను" అనుకున్నాడు.

అయితే దేవుడు అతడితో "మూర్ఖుడా! ఈ రాత్రి నీ ప్రాణం అడుగుతున్నాను. నువ్వు కూడబెట్టినవి ఎవరివి అవుతాయి?" అని అతడితో అన్నాడు. దేవుని విషయంలో ధనవంతుడు కాకుండా తన కోసమే సమకూర్చుకునే వాడు అలాగే ఉంటాడు"❇

✔ ధనవంతుడు అక్రమంగా సంపాదించాడని చెప్పబడలేదు. సంవత్సర సంవత్సరానికి అతను ఎంతో కష్టపడి సంపాదించివుంటాడు. మెరుగైన పంట పండటానికి రాత్రింబవళ్లు శ్రమించివుంటాడు. అతని మూలంగా అనేకులకు (పంటవేసేవారికి, కోసే వారికి, కూలీలకు, కొట్లు కట్టేవారికి) పని దొరికుతావుంది. అలాంటప్పుడు అతని కష్టార్జీతం అతను తినటానికి యోగ్యుడే కదా? మరి దేవుడేందుకు అలా చూడట్లేదు?

✔ తన సంపాదనకు తానే సర్వ హక్కుదారున్నని (యజమానినని) భావించాడు. తన శరీర సంతోషం, సుఖం గూర్చే ఆలోచించాడు కాని అందులో నివాసముంటున్న నిత్యమైన ఆత్మను విస్మరించాడు. సమస్తం నావి అనుకుంటున్నాడే కాని, తన తోటి మనుషుల సహయార్ధం దేవుడు తనకిచ్చిన ధనాన్ని వ్యర్ధపరిచాడు.

✔ ఈ లోకంలోకి వట్టి చేత్తో వచ్చాము..అలానే వెళ్తాము. మనం చమటోడ్చి సంపాదించినా కూడా, నేడు మన దగ్గర ఏమైనా ఉంది అంటే, అది దేవుని సోత్తే! ధనవంతుని పంట వేసిన భూమి, అది పండటానికి కావాల్సిన నీరు, మొలిచిన మొక్కలు సమస్త సృష్టి ఆయనదే కదా! కాబట్టి భయభక్తులు కలిగి, కృతజ్ఞతపూర్వకమైన ఆరాధనకు దేవుడు అర్హుడు.

✔ మన ప్రాణాత్మ దేహాలపై దేవునికి సర్వహక్కు ఉంది.మనవి అనుకున్న వాటితో మనకు ఎలాంటి సంబంధం లేకుండా చెయ్యడానికి ఆయనకు క్షణం చాలు. మన జీవితాలు సృష్టికర్తతో ముడిపడివున్నాయి. మానవుని ఆత్మ దేవునితో సంభంధం కోసం ఇవ్వబడింది. దీనిని మరువకూడదు. సంపద దేవుని స్థానాన్ని ఆక్రమించగలదు. అప్పుడు దేవుడు ధనవంతున్ని పిలిచిన పిలుపుతో మనల్ని పిలుస్తాడు.

౼ మన జీవితానికి వెలుగైవున్న(సత్యమైవున్న) దేవుణ్ని మరిచిపోతే, గనుక ఎటువైపు వెళ్తున్నామో తెలియని (అబద్దమైన) చీకట్లో బ్రతుకుతాము.