25 July 2017

 యేసు, ఆయన శిష్యులు గలలీకి ఎదురుగా ఉండే గెరాసేను ప్రాంతానికి వచ్చారు. ఆయన ఒడ్డున దిగగానే దయ్యాలు పట్టి చాలా కాలం నుండి బట్టలు కట్టుకోకుండా, సమాధుల్లో తిరుగాడే ఆ ఊరి వాడొకడు ఆయన్ని ఎదురుగా వచ్చాడు..

ఆయన "ఈ వ్యక్తిని వదిలి బయటకు రా" అని ఆ అపవిత్రాత్మకు ఆజ్ఞ ఇచ్చాడు..."పాతాళంలోకి వెళ్ళమని తమకు ఆజ్ఞ ఇవ్వవద్దని" దెయ్యాలు ఆయనను ఎంతో బతిమాలాయి.పందుల మందలో చొరబడడానికి అనుమతినిమ్మని ఆయనను బతిమాలినప్పుడు ఆయన వాటికి అనుమతినిచ్చాడు. వెంటనే ఆ మంద ఎత్తైన కొండపై నుండి పరుగెత్తుకుంటూ వెళ్లి సరస్సులో పడి ఊపిరి ఆడక చచ్చాయి.

ఆ పందుల్ని మేపుతున్న వారు వెళ్ళి, పట్టణంలోనూ చుట్టుపక్కల గ్రామాల్లోనూ జరిగిందంతా చెప్పారు.ఆ ఊరి ప్రజలు యేసు దగ్గరకు వచ్చి, అక్కడ దయ్యాలు వదిలిన వాడు బట్టలు కట్టుకుని స్థిమితంగా యేసు పాదాల దగ్గర కూర్చుని ఉండటం చూసి భయపడి, తమను విడిచి వెళ్ళమని ఆయనను బతిమాలుకున్నారు.

ఆయన తిరిగి పడవ ఎక్కి వెళ్లబోతుంటే దయ్యాలు విడిచిన వ్యక్తి తనను కూడా ఆయనతో ఉండనిమ్మని బతిమాలాడు. కానీ ఆయన "నువ్వు నీ ఇంటికి వెళ్లి దేవుడు నీకు చేసిన గొప్ప విషయాలను చెప్పు" అని వాణ్ణి పంపి వేశాడు. వాడు వెళ్లి యేసు తనకు చేసిన గొప్ప కార్యాన్ని గురించి ఆ పట్టణమంతా ప్రకటించాడు. ❇

☑ ఇక్కడ యేసును ముగ్గురు వేడుకున్నారు. సేన దెయ్యాలు, ఊరి ప్రజలు మరియు దెయ్యాలు వదిలిపోయిన వ్యక్తి. యేసు దెయ్యాల విన్నపానికి సరే అన్నాడు, ఊరి ప్రజలు విడిచి పెట్టి వెళ్ళమన్నప్పుడు, మౌనంగా ఆ ప్రాంతాన్ని వదిలి వెళ్ళాడు.

దేవునికి లోబడకుండా, మన సొంత కోరికల కోసం చేసే ప్రార్థనలు, అవి పొందుకున్నప్పుడు..మనల్ని బట్టి దేవుడు సంతోషిస్తున్నాడని, మనం ఆయన చిత్తంలో ఉన్నామని భ్రమపడకూడదు. ఆయన చిత్తం చేసే ఉద్దేశ్యం లేని వారి జీవితంలో దేవుడు బలవంతంగా కలుగజేసుకోడు. పై విధంగా వారి కోరికలను మన్నించవచ్చు, కానీ వారి ఆత్మలకు కీడు జరగవచ్చు.

☑ ఐతే దెయ్యాలు వదలగొట్టబడి, బాగుబడిన ఆ వ్యక్తి ప్రేమతో ఆయనతోనే ఉండాలన్న కోరికను మాత్రం యేసు తిరస్కరించాడు. కారణం...ఎవరైతే ఆయన్ను ప్రేమించి, మాటను గౌరవించి, ఆయన చిత్తమే తమ జీవితంలో జరగాలని ఎవ్వరు ఇష్టపూర్వకంగా కోరుకుంటారో, వారి జీవితంలో ఆయన తన చిత్తానిసారంగా జరిగిస్తాడు. ఏది మనకు సరైన మార్గమో మన కంటే ఆయనకే బాగా తెలుసు కదా! ఆయన చేసే ప్రతి కొదువ వెనుక ఆయన అమూల్యమైన ఉద్దేశ్యాలు దాగి ఉంటాయి. గాఢాంధకారపు లోయల అనుభవాలు, శిక్షలు, పరీక్షలు, శ్రమలు కూడా మనలో నిరీక్షణను కలిగిస్తాయి. ఆయన ఏ స్థితిలో ఉంచితే అదే మనకు సరైన స్థానం. అప్పుడే ఆయన ఉద్దేశ్యాలు మనలో నెరవేరబడగలవు.

☑ తండ్రి తనకు ఇష్టమైన(పట్టించుకొనే) కుమారున్నే ప్రేమించి శిక్షిస్తాడు. ఆయన చిత్తాల్లో నుండి తొలగినవారు, ఇలాంటి అనుభవాల్లో ప్రవేశించలేరు. మనం కోరుకున్నది దొరికినప్పుడు కాదు స్తుతించాల్సింది, ఆయన మాట నుండి, ఆలోచనల్లో నుండి తొలగిపోలేదన్న నిశ్చయతను బట్టే మన ఆనందం పరిపూర్ణమవ్వాలి.