19 July 2017

 ఆదివారం ఉదయాన్నే ఇంకా చీకటిగా ఉండగానే మగ్దలేనే మరియ సమాధి దగ్గరకు వచ్చి, అక్కడ సమాధి పైన ఉంచిన రాయి తీసి ఉండటం చూసింది..మరియ సమాధి బయటే నిలబడి ఏడుస్తూ ఉంది. ఆమె సమాధిలోకి వంగి చూసింది.
ఆమెకు ఇద్దరు దేవదూతలు కనిపించారు. వాళ్ళు తెల్లని బట్టలు వేసుకుని ఉన్నారు. యేసు దేహం ఉంచిన చోట ఒకడు తల వైపునా మరొకడు కాళ్ళ వైపునా కూర్చుని ఉన్నారు.

దేవదూతలు-"అమ్మా, ఎందుకు ఏడుస్తున్నావు?"
మరియ-"ఎవరో నా ప్రభువును తీసుకు వెళ్ళిపోయారు. ఆయనను ఎక్కడ ఉంచారో తెలియడం లేదు"

ఆమె ఇలా పలికి వెనక్కి తిరిగి అక్కడ యేసు నిలబడి ఉండటం చూసింది. కానీ ఆయనను ఆమె గుర్తు పట్ట లేదు.
యేసు-"అమ్మా, ఎందుకు ఏడుస్తున్నావు? ఎవర్ని వెదకుతూ ఉన్నావు?". ఆమె ఆయన్ను తోటమాలి అనుకుని-
"అయ్యా! ఒకవేళ నువ్వు ఆయన్ను తీసుకు వెళ్తే, ఆయన్ను ఎక్కడ ఉంచావో చెప్పు. నేను ఆయన్ను మోసుకొని వెళ్తాను"
అప్పుడు యేసు- "మరియా" అని పిలిచాడు. 
❇

✔ పునరుద్దాన దినం రోజు ఆయన తల్లియైన మరియ గూర్చిన ప్రస్తావన లేదు, కాని 4 సువార్తల్లో మగ్దలేనే మరియ(7దయ్యాలు పట్టి, యేసుచేత బాగుచేయ్యబడ్డ స్త్రీ) గూర్చి వ్రాసివుంది. మగ్దలేనే మరియకు ఆయన పునరుద్దానం గూర్చి గొప్ప విశ్వాసం ఉన్నట్లు కనిపించట్లేదు(మార్కు 16:1,3). కాని ప్రభువు మీద నిండైన ప్రేమ ఉంది.ఆ దినాల్లో శిష్యులు సైతం ప్రాణభయంతో దాగి ఉన్నారు. పెద్ద రాయి చేత మూయబడి, కావలి వారి చేత భద్ర పరచబడి, ప్రభుత్వం ముద్ర వేయబడన సమాధి దగ్గరకు వెళ్ళడానికి స్త్రీలకు ఎంతో ధైర్యం(ప్రేమ) కావాలి.

✔ ప్రభువు దేహానికి పూయడానికి సుగంధ ద్రవ్యాలను ముందే సిద్ధపరచుకొని, ఎవరో ఒకరు తప్పక రాతిని పొర్లిస్తారని ఆశతో పెందలకడనే లేచి సమాధి వైపు నడచిన నడకలో ఆమెకు(ఆ స్త్రీలకు) దేవుని పట్ల ఉన్న ఆ ప్రేమను దేవుడు గుర్తించాడు. కనుకనే తన దూతను పంపి రాతిని వారి నిమిత్తమే తొలగించాడు.

✔ మగ్దలేనే మరియ తనకు తెలియకుండానే దేవదూతల ముందు, ప్రభువు ముందు తన ప్రేమను తెలియజేసింది. ఆమెకు దేవునిపై ఉన్న ప్రేమే, ఆమెను దేవుని ముందు ప్రత్యేకంగా నిలబెట్టింది. పరలోక తండ్రిని కలుసుకోక ముందు ప్రభువు మహిమ దేహంతో మొదట ఆమెకే దర్శనమిచ్చాడు (యోహాను 20:17). బలహీనులైన(వాక్య జ్ఞానంలో, విశ్వాసంలో మె|| విషయాల్లో) వారిని సైతం దేవుని యెదుట ప్రత్యేకంగా నిలిపేది, దేవునిపై వారికున్న ప్రేమే!తన దుస్థితిలో దేవుడు చూపిన ప్రేమ, కనికరంలో నుండే, కృతజ్ఞతాపూర్వకంగా ఈ ప్రేమ పుడుతుంది.

☑ పౌలు-"విశ్వాసం, నిరీక్షణ, ప్రేమ ఈ మూడూ నిలుస్తాయి. ఐతే వీటిలో ఉన్నతమైనది ప్రేమే"(1కొరింధి13:13)