01Aug2017

 సువార్త నిమిత్తం ఖైదీగా ఉన్న పౌలు తన వాదనను కైసరు చక్రవర్తి ముందు చెప్పుకొంటానని కోరాడు. కాబట్టి పౌలుతో పాటు మరికొందరు ఖైదీలను తీసుకొని శతాధిపతి ఓడలో ఇటలీకి ప్రయణమయ్యాడు. కానీ గొప్ప తుఫాను వల్ల ఓడ బద్దలైపోయే పరిస్థితి వచ్చింది. ఓడ కొట్టుకొని పోయి 'మెలితే' అనే ఒక ద్వీపం దగ్గరకు వచ్చింది. అనాగరికులైన ద్వీపవాసులు వారికి ఎంతో సహాయపడ్డారు. వర్షం కురుస్తూ చలిగా ఉండడంతో వారు నిప్పు రాజబెట్టారు.

అప్పుడు పౌలు కొన్ని పుల్లలేరి నిప్పుల మీద వేస్తుండగా ఒక పాము ఆ వేడికి బయటికి వచ్చి అతని చెయ్యి పట్టుకుంది. ఆ ప్రజలు ఆ పాము అతని చేతిని పట్టుకొని వేలాడటం చూసి, 'ఈ మనిషి తప్పకుండా హంతకుడై ఉంటాడు. ఇతడు సముద్రం నుండి తప్పించుకొన్నప్పటికీ న్యాయం మాత్రం అతణ్ణి బతకనియ్యద'ని తమలో తాము చెప్పుకొన్నారు. కానీ పౌలు మాత్రం ఆ విష జంతువును మంటలో జాడించివేసి, ఏ హానీ పొందలేదు.

వారైతే అతని శరీరం వాచి పోవడమో, అతడు అకస్మాత్తుగా పడి చనిపోవడమో జరుగుతుందని కనిపెడుతున్నారు. చాలాసేపు కనిపెట్టిన తరువాత అతనికి ఏ హానీ కలగకపోవడం చూసి తమ అభిప్రాయం మార్చుకొని, 'ఇతడొక దేవుడు' అని చెప్పసాగారు.🔹(అపో 28:1-6) 

☑ పౌలు నిమ్మళమైన వైఖరిని గమనించండి. ఎందుకంటే పౌలు ఓడలో ఉన్నప్పుడు..
ఒక దేవదూత అతనితో౼'పౌలూ! భయపడకు. నీవు కైసరు ముందు నిలబడాల్సివుంది. ఇదిగో! నీతో కూడ ఓడలో ప్రయాణిస్తున్న వారందరినీ దేవుడు నీకు అనుగ్రహించాడు' అని చెప్పాడు.(అపో 27:23,24)

☑ పరలోకం నుండి దేవదూతను పంపిన దేవుడు, తుఫానును ఆపలేడా? పైగా తుఫానును పంపించిందే ఆయన! ఆ పరిస్థితుల ద్వారా పౌలు నడిపించబడటాన్ని బట్టి, దేవుడు మెలితే ద్వీపనికి, ఓడలోని వారికి సువార్తను తీసుకొని వెళ్ళాడు. శ్రమల్లో గుండా వెళ్తూ, దేవుని ఉద్దేశ్యలను గ్రహించడం పౌలు నేర్చుకొన్నట్లు మనం నేర్చుకోవాలి. ప్రతి పరిస్థితి దేవుని ఆధీనంలో ఉందని విశ్వసిస్తూ, ఓర్పుతో భరిస్తూనే, ఆయన చిత్తం ఏమిటో గ్రహించాల్సివుంది. విశ్వాసి జీవితంలో ఆయన తిప్పే ప్రతి మలుపు ఆశీర్వదకరమైన అనుభవానికి ఒక మెట్టు.

☑ పౌలును పాము కాటు వేయునట్లుగా అనుమతించింది ఎవరు?దేవుడే! నిజానికి వారంతా అది 'దేవుని శిక్ష' అనుకొన్నారు. అక్కడ ఉన్న వారందరిలో అత్యంత పరిశుద్ధున్ని, అందరి కంటే పాపాత్మునిగా భావించారు. "వీళ్ళు నా వారు" అని సాక్షమియ్యడానికి, కొన్ని బాధాకరమైన సంఘటనలను సైతం దేవుడు వాడుకుంటాడు. ఈ సంఘటన ద్వారా దేవుడు.. పౌలు విశ్వాసానికి పదును పెడుతూనే, ఇతరులకు మేలుకరంగా మరల్చుతున్నాడని గమనించండి. పౌలు గలిబిలి అవ్వలేదు. అనుభవజ్ఞుడైన క్రైస్తవునిగా దేవుణ్ని ఆనుకొని, నిమ్మళమై ఆయనను(దూత ద్వారా దేవుడు చెప్పిన మాటను) విశ్వసించాడు. కాబట్టే ఆశీర్వాదకారకుడయ్యాడు.

◆ విశ్వాసం అంటే దేవుని పనులు(ఉద్దేశ్యాలు/ప్రణాళికలు) ఏమీ అర్థం కాకముందే, మేలు చేయు ఆ దేవుని నమ్మకత్వాన్ని నమ్మడం.